Baras sapuluh balik

Baras sapuluh balik

GARBUS himung banar karna tahun ini hasil katamannya banyak banar, biar musim kamarau tapanjang tapi hasilnya parak dua kali tahun lalu.

"Kataman bahasil artinya kampung kita makmur biarpun zaman krismon dan musim kamarau panjang, panghidupan warga kita kada sakit," ujar Palui.

"Makanya kalu handak baduit dan gawian bahasil jangan malandau bangun, imbah sambahyang subuh langsung haja ambil cangkul lalu tulak kapahumaan," ujar Garbus manasihati.

"Tarima kasih nasihat ikam Bus ai, tapi ampun maaflah aku mamunji ini kadada maksud handak maminta apa-apa apalagi maminta duit karna aku pun kada kakurangan duit," sahut Palui sambil mahampas salipi kahadapan Garbus.

"Kalu kaya itu aku basyukur jua kawan sanang," ujar Garbus.

"Tarus tarang haja Bus ai biarpun aku malandau bangun dan jarang bakakawanan di sini tapi aku wan biniku ada usaha dan cukup haja maungkusi anak sakulah," ujar Palui.

"Napa usaha ikam Lui?" ujar Garbus batakun.

"Aku dapat razaki dana kumpinsasi BBM nang hanyar babagi di kalurahan, kupakai gasan bajualan wadai, nasi bungkus wan katupat wan sabagiannya gasan mudal kios," ujar Palui sambil batuhui.

"Wah, kalu kaya itu nyaman banar hidup ikam," ujar Gabus.

"Karna ikam hanyar mangatam dan banyak pahulihan maka tulunglah Bus antari aku baras hanyar," ujar Palui.

"Banyakkah Lui ikam handak, barapa balik?" ujar Garbus.

"Kada banyak pang hanya gasan katupat wan nasi kabuli, kurang labih sapuluh balik haja," ujar Palui.

Kamariannya datanglah Garbus ma-antarakan baras hanyar pasanan Palui, karna pasanannya banyak sampai sapuluh balik maka Garbus tapaksa manyiwa garubak.

"Lui..........ui Palui, ininah aku ma-antarakan baras pasanan ikam," ujar Garbus bakiyau.

"Bawa-akan ka dapur, biniku mahadangi barasnya gasan dirandam diulah galapung," ujar Palui sambil kaluar rumah mamaraki Garbus. Palui takajut banar karna Garbus ma-antarakan pasanannya bakarung-karung wan garubak.

"Kanapa maka banyak banar sampai bakarung-karung Bus?" ujar Palui.

"Sasuai pasanan ikam sapuluh balik," sahut Garbus.

"Maksudku......... maksudku sapuluh balik halus, sapuluh cuntang haja, kadanya sapuluh balik 20 liter itu," ujar Palui.

"Waahhhh........ Paluuiiii, kanapa maka kada jalas-jalas bapasan sapuluh cuntang haja, padahal kuantari bagarubak. Kalu kaya itu haraga sapuluh cuntang haja kada cukup gasan mambayar siwa garubaknya," ujar Garbus marista kakalahan.

Bapantun

Bapantun

URANG bahari itu katuju banar bapapantunan. Biasanya pantun dipakai bubuhan nang tuha-tuha gasan basulu handak manakunakan bibinian nang handak dilamar, wayah baantaran patalian atawa wayah sambutan baninikahan. Tapi wayah ini sudah kada tapi tadangar lagi.

"Bapapantunan itu ngalih Mak ai karna harus pintar baulah kalimat dan mamilih kata-katanya supaya pas napa nang dimaksud," ujar Palui.

"Baiknya dihidupakan pulang Lui ai karna itu tamasuk budaya kita," ujar Tulamak.

"Aku katuju jua dihidupakan pulang Lui ai," ujar Garbus.

"Wayah ini ngalih mancari urang nang bisa itu Bus ai karna urangnya sudah tuhaan dan sudah matian. Wayah ini kadada lagi nang mawarisinya, kalu ada paling-paling saikung dua," ujar Palui.

"Baiknya kita nang anum-anum ini jadi pawarisnya, kalu balum bisa tapaksa harus balajar," ujar Tulamak.

"Kalu ikam ada baisi mudal pantunnya, ayu haja diungkai," ujar Garbus manyuruh Tulamak.

"Aku ada haja baisi sabuting dua, bila ku-ungkai supaya dibalas," ujar Tulamak sambil basiap-siap handak bapantun :

"kukira cuka sakalinya asam pauh. Kukira bilungka, sakalinya waluh,"

"Sakalinya pintar jua Tulamak ini bapantun, ayu kuangsul," ujar Garbus basiap-siap mambalas:

"kukira akar, sakalinya kangkung. Kukira tangan Tulamak pingkar, eeee...... sakalinya tingkung

"Ayu tarusakan Lui, ikam biasanya banyak baisi mudal," ujar Garbus manyuruh Palui.

"Dangarkan baik-baik gasan ikam badua tapi jangan tasinggung, partama gasan Garbus," ujar Palui mamulai pantunnya :

"kukira babaris, sakalinya bajurut. Kukira batis, sakalinya buntut.

"Sabutingnya gasan Tulamak, dangarakan," ujar Palui.

"kukira lontong, sakalinya asam parut. Kukira kantung, eeee...... sakalinya burut.

"Hahaha..... hahahaa...........," ujar bubuhannya taimbai tatawaan karna sudah bisa batutur pantun, walaupun pantunnya saling manyikut dan manyindir.

SEJARAH BANJARMASIN

Asal mula nama Kota Banjarmasin.
berasal dari sejarah panjang
Kota Banjarmasin.
Pada saat itu dikenal nama Istilah
Banjarmasih.
Sebutan ini diambil dari nama salah seorang Patih yang sangat berjasa dalam pendirian KerajaanBanjar, yaitu
Patih Masih, yang berasal dari Desa Oloh Masih yang dalam bahasa Ngaju berarti orang Melayu atau Kampung Orang Melayu. Desa Oloh Masih inilah yang kemudian menjadi Kampung Banjarmasih.
Patih Masih bersama dengan beberapa Patih lainnya sepakat mengangkat Pangeran Samudera mejadi Raja.
Pangeran Semudera ini adalah seorang Putera Kerajaan Daha  yang terbuang dan mengasingkan diri di desa Oloh Masih. Sejak itu terbentuklah kerajaan Banjar. Pangeran Samudera kemudian menaklukkan Muara Bahan dan kerajaan
kecil lainnya serta jalur-jalur sungai sebagai pusat perdagangan pada waktu itu.Kemajuan kerajaan Banjar ini tentu saja mengusik kekuasaan
Pangeran Tumenggung,
raja Daha yang juga Paman dari Pangeran Samudera.
Sehingga terjadi penyerbuan oleh Daha. Peperangan yang berlarut-larut  menyebabkan Pangeran Samudera terdesak, dan meminta Kerajaan Demak yang merupakan kerajaan Islam pertama dan terbesar di Nusantara.
Demak bersedia membantu kerajaan Banjar, dengan syarat raja dan rakyatnya masuk Islam.
Pengeran Samudera setuju dan tentara Demak datang bersama Khatib Dayan yang kemudian mengislamkan rakyat Banjar. Sejak itu Pangeran Samudera berganti nama menjadi Sultan Suriansyah.
Dengan bantuan Demak, Banjar menyerbu Daha dan mengalahkannya.
Peristiwa itu terjadi pada tanggal24 Desember 1526,

sehingga tanggal tersebut dijadikan sebagai
Hari kemenangan Pangeran Samudera, dan cikal bakal Kerajaan Islam Banjar
Penyerahan kerajaan Daha kepada kerajaan Banjar.
Hari Jadi Kota Bandjarmasih sebagai ibukota kerajaan baru yang menguasai sungai dan daratan Kalimantan Selatan.Sampai dengan tahun 1664 surat-surat dari Belanda ke Indonesia untuk kerajaan Banjarmasin masih menyebut Kerajaan Banjarmasin dalam ucapan Belanda “Bandzermash”.
Setelah tahun 1664 sebutan itu berubah menjadi Bandjarmassin, dan pertengahan abad 19, sejak jaman jepang kembali disebut  Bandjarmasin atau dalam ejaan baru bahas Indonesia menjadi Banjarmasin.Nama lain kota Banjarmasin adalah kotaTatas diambil dari nama pulau Tatas yaitu delta yang membentuk wilayah kecamatan Banjarmasin Barat dan sebagian Banjarmasin Tengah yang dahulu sebagai pusat pemerintahan Residen Belanda.

sumber bacaan :
http://www.banjarmasinkota.go.id/banjarmasin/profile/sejarah.html

Angka baik

Angka Baik

BUBUHAN Palui bila takumpul, pasti macam-macam nang dipanderakan. Mulai sual bibinian, lalu ka sual pulitik, bubuhan silibiriti, sampai sual main bal.

“Ayu Mak kita bapander main bal,” ujar Garbus mambawai Tulamak.

“Aku akur banar Bus ai karna main bal adalah kasananganku,” ujar Tulamak.

“Bal itu bulat ngalih ditangguh Mak ai, makanya jangan wani bataruh sambarangan, karna nang dikira manang malah tajarungkup,” ujar Garbus.

“Jadi kaya apa harapan ikam Bus? ujar Tulamak.

“Wayahini zaman ripurmasi, dimukrasi, siapa haja bulih bakumentar dan siapa haja bulih manang,” ujar Garbus.

“Asal haja manangnya itu jujur dan sapurtif, kada main suguk-sugukan,” ujar Tulamak.

“Aku akur banar Mak ai, mudahan haja main suguksugukan, pelicin, pelancar kaya di urang pulitik itu kada manular ka pamain bal,” ujar Palui nang hanyar datang umpat manyahut.

“Palui tamasuk salah tangguh jua, manjagauakan Inter Milan sakalinya keok jua,” ujar Garbus.

“Hiih, bujur ujar ikam itu Bus ai, Nang mangalahakan Inter samalam tanyata kasabalasan nang kada tarkanal. Ngarannya haja kada parnah kita dangar,” ujar Palui.

“Maka itu dalam hidup kita ini jangan takabur, bila ikam harat maka ada lagi nang labih harat, bila ikam sugih maka ada lagi nang labih sugih, bila ikam wani maka ada lagi nang labih wani,” ujar Tulamak.

“Jadi kalu kaya itu napa nang manarik bila manuntun main bal itu Lui?” ujar Garbus.

“Tarus tarang haja aku himung banar wan baju-baju pamainnya, baik-baik dan ba-aneka ragam,” ujar Palui.

“Kalu sual baju main bal itu dimana-mana sudah banyak dijual,” ujar Tulamak.

“Aku nang tatarik banar wan numur-numur bajunya, pamain nang baik musti dibari numur 10, cuntuhnya Maradona numur 10, Rivaldo numur 10, Zidane numur 10, Totti numur 10,” ujar Palui
pina lancar manyambati ngaran-ngaran pamain banumur sapuluh.

“Oooooo...... jadi ikam tatarik dan katuju wan angka-angkanya karna angka itu ikam anggap bakaramat.

Kalu sual numur-numur nang baik ada jua Lui ai, yaitu numur Crespo wan numur Ronaldo, yaitu angka sambilan,” ujar Garbus.

Mandangar Palui wan Garbus bapander angka-angka, Tulamak nang duduk di higanya karinyum-karinyum sambil tangannya orat-orit ka kartas.

“Angka 10 angka 9, angka 10 angka 9 jadi satu... kosong... sambilan...” ujar Tulamak gagarunum sambil parmisi bulik.

“Dasar Tulamak, kada mau jara-jaranya sudah babarapa kali ditangkap pulisi karna umpat judi kupu alias kupon putih,” ujar Palui wan Garbus mangalakak mananawaakan Tulamak nang pina balenggang jalannya.

Blogger.com

Buat blog mu lewat hp atau pc sekarang juga.
1.buka blogger.com
2.masukkan email mu (gmail)
3.pilih bahasa dan pilih akun blogger atau akun google+
4.buat blog
Dan kelola lah blog mu!!!!!

Bakipuh kapanasan

Bakipuh Kapanasan

WAYAH baisukan itu, mangincang Palui badua wan bininya liwat. Garbus wan Tulamak nang matan tadi badudukan di warung acil Irus, sawat bingung malihat Palui laki bini pina galapah-galupuh.

“Napa maka pina habang muha Lui, handak ka mana pina bairingan wan bini,” ujar Tulamak managur.

“Kami kandak ka puskesmas, bapariksa awakku, balukuk rasa maradang panas,” ujar Palui.

“Itulah gara-gara kada kawa maatur makanan karna ikam paling katuju makanan nang padas-padas, makanan balumbuk, basahang, basambal lalu panasnya sampai ka awak,” ujar Garbus.

“Makananku kaya bubuhan ikam jua, iwak maunjun, lalapan mamutik, banih manutuk,” ujar Palui.

Imbah sampai di puskesmas Palui dipariksa, tapi nyatanya awak wan kapala ikam sihat-sihat haja kada panas.

“Parasaan ikam kaya apa Lui, kupariksa samunyaan nurmal haja kada garing,” ujar mantri.

“Parasaanku bujur-bujur panas, mambarangat, rasa luyuh balakang kada tahan manyandang. Kalu samalam bujur aku ngalu kapala dan balukuk rasa ringkut bakas baangkut kayu,” ujar Palui.

“Ayu buka baju samunyaan kupariksa sa-awakan,” ujar mantri. “Nah, nahhhh ... ini napa di balukuk wan di balakang ikam? Ini napa pina batimpelan lima buting koyo lombok?” ujar mantri.

“Ooo ... bakas samalam mantri ai, aku kada ingat mamacul, rupanya koyo-koyo inilah nang maulah aku kapanasan,” ujar Palui pina supan mangakui.

“Makanya hati-hatilah mamakai ubat, tanyata samalam itu ngalu kapala wan balukuk ikam nang ringkut sudah waras, tapi karna kada ingat mamacul koyo lombok itu maka ikam bakipuh kapanasan,” ujar mantri mangalakak mananawaakan Palui. 

Pasan palui gasan pulai

Pulai adalah anak palui,
Inya sakulah sd kalas 3 lawan pulai nii ma asi banar lawan palui.
Palui bapasan lawan pulai:
Nak nukar baju sd di pasar nah abah unjuki duitnya.
Nukar pulai,sampai dirumah pas di cuba kada sadang.
Lalu palui bapasan, mun nukartu cubai dulu.
Pulai ujar palui tukarakan abah kurek api,
Nukar pulai ,lawas palui mahadangi kanapa jar palui pulai lawas banar.
Datang pulai nah bah sudah ulun cubai mau barataan.
Di buka palui haahh.... jar palui kanapa hirang barataan kurek nya.
Maka mun handak nukar di cubai dulu ujar pulai.

Banyak kalabihannya

Banyak Kalabihannya

SALAWAS badiam di Banjar ini sudah lima anam kali Palui wan bininya bapindah rumah. Alasannya karna bini Palui cemburu laki itu rancak manyirit bini tetangga nang langkar? Lalu imbah pindah rumah timbul pulang cemburunya karna laki rancak disirit dan dirayu bini tetangga. Mau kada mau bini Palui marunca-runca minta bawai bapindah pulang.

“Batatangga itu memang saraba ngalih Bus ai, apalagi batatangga wan urang sugih, urang langkar, urang bapangkat. Sabujurnya cintaku wan Palui itu sudah kadada lagi,” ujar bini Palui mangakui.

“Kalu sudah kadada lagi cintanya wan Palui kanapa maka ikam sampai wayah ini pina makin rikit banar kada ubahnya kaya kukang haja,” ujar Tulamak.

“Cintaku memang sudah kadada lagi wan lakiku Palui itu karna sudah baubah manjadi kasih sayang. Kasih sayang itu labih tinggi nilainya dari cinta monyet,” ujar bini Palui babahasa ABG.

“Aku himung banar mandangar panderan ikam ini bini Palui ai. Kada rugi Palui bahujan bapanas siang malam mahaluki ikam wayah bujangan dahulu karna cintanya adalah cinta karas. Kasih sayang ikam badua itu ibarat paribahasa ‘bila cinta sudah melekat maka tahi gigi serasa suklat’,” ujar Garbus mambalas bahasa ABG nang diucapakan bini Palui.

“Aku umpat batakunlah bini Palui dan jawab sabujurnya, napa alasannya maka tahi gigi itu serasa suklat itu?” ujar Tulamak.

“Ampun maaflah, karna bubuhan ikam sudah lawas tahu dan sudah lawas patuh wan lakiku Palui pasti sudah tahu kalabihannya,” ujar bini Palui.

“Ampun maaflah jua, kami sudah tahu kalabihnnya yaitu muhanya pina baracak bakas kacacaran, balukuknya batukul kaya urang mambawa parang, jariji tangan kirinya labih sabuting,” ujar Tulamak.

“Muha baracak itulah nang maulah nyaman bagisang bila wayah bacium, tukul di balukuk itu gasan baingkut wayah baragap dan jari labih manyamani bila bagaru,” ujar bini Palui kada hakun kalah.

“Ooo... jadi kalabihan itu ada manfaatnyalah bini Palui?” ujar Garbus.

“Ada lagi kalabihan lainnya nang kada kalihatan tapi hanya bisa dirasakan,” ujar bini Palui.

“Napa itu bini Palui?” ujar Garbus.

“Lakiku itu ada baisian tiga bigi butir di kapalanya nang aduhaiii... bila dipakai,” ujar bini Palui pina bakirik-kirik galianan.

Mandiriakan shalat

Mandiriakan Shalat

IMBAH marasa awak kada kaya dahulu lagi, imbah itu umur sasar batuha Hanyar Palui handak balajar agama lawan Tuan Guru. Kada ngalang-ngalang inya satiap hari mandatangi tuan gurunya itu, kamana haja tuan guru babacaan inya datangi. Tapi wayah parmulaan balajar ada kajadian nang lucu, maraga Palui urangnya dasar buntat wan kada tapi pamahaman.

"Ikam Lui ai diriakan salat dan bayarakan zakat, Insya Allah ikam salamat dunia wan akhirat," ujar Tuan Guru bapapadah.

"Uh kaitu kah? ujar Palui dalam hati. "Inggih guru ai, mulai wayahini handak ulun gawi papadahan pian itu di rumah," ujar Palui.

Sampai di rumah dasar bujur digawinya napa yang dipadahi ulih tuan guru. Takakajut nang bini malihat kalakuan Palui nitu.. "Ui abahnya kanapa pian wayah ini pina manyanyalah haja?"

"Manyalah apanya umanya?" ujar Palui kada paham.

"Pian itu sambahyang mayat kah, sambahyang magrib kah?" ujar bininya pulang.

"Jalas ai aku sambahyang magrib. Kanapa maka dipadahakan manyalah?"

"Itu tadi pian sambahyang pina badiri tatarusan kadada ruku wan sujudnya. Kada manyanyalah lah ngarannya?!" ujar bininya.

"Aku sambahyang ini kadanya bahapal pang, aku manuruti papadahan tuan guru jua," ujar Palui pina sarik dipadahi manyalah.

"Uuu.. kaya itu kah? Siapa guru sampian itu? Kaina ulun laporakan ka MUI supaya dipariksaakan kalu-kalu aliran sasat," ujar bininya maancam.

"Jangan sambarangan malapor-laporakan urang, kalu ikam nang katulahan. Aku ini baguru wan guru Jali jua, tuan guru nang rancak bacaramah di masigit wan sidin itu urang MUI jua, jadi kada sasat," ujar Palui sarik.

"Hau, kada usah mangaramput abahnya ai. Kalu Guru Jali itu ulun tahu ai. Wayah jadi imam di masigit, sidin mamimpin sambahyang bujur haja, kada suah talihat manyiwah nangkaya pian tadi," ujar bini Palui.

"Aku ini manuruti papadahan sidin jua supaya mandiriakan sambahyang wan mambayarakan zakat," ujar Palui karas.

Lawas bini Palui bapikir, hanyar imbah itu inya tatawa. "Hahaha.. abahnya-abahnya.. Kajadian katuhaan hanyar handak balajar agama, utak sudah batagar, kada kawa bapikir bujur lagi," ujar bini Palui manawaakan. "Pian ini kada pahaman. Nang ngarannya mandiriakan salat itu lain sumbahyang badiri tapi maksudnya digawi bujur-bujur karana Allah Taala," ujar bini Palui bakuling kapala malihat kababungulan lakinya.

Dihurung pampijit

Wayah jaman saraba sakit ini, masyarakat dianjurakan pamarintah bahemat. Sual makanan jangan talalu balabihan, nang panting bagizi dan sihat. Sualnya, haraga ubat makin balarang.

“Wayahini haraga ubat makin balarang, makanya dianjurakan supaya batanam aputik hidup,” ujar Garbus.

“Aku akur banar Bus ai karna ubat-ubat itu asalnya matan tanaman jua. Makanya turutilah urang bahari nang katuju batatanaman macammacam tumbuhan dihiga rumah dan baguna gasan baulah jamu atawa gasan ubat,” ujar Palui.

“Tapi jaman kamajuan wayahini halaman rumah kada lagi ditanami gasan aputik hidup tapi sudah diganti wan kakambangan,” ujar Garbus.

“Pantas haja kaya itu Bus ai, karna bila sakit sadikit haja lalu tulak ka dukter atawa langsung manukar ubat ka aputik atawa ka pasar,” sahut Palui.

“Nyaman haja manukar ubat bila ada duitnya tapi bagi kita nang pas-pasan ini jangankan ka dukter atawa manukar ubat, gasan manukar baras wan iwak haja balangsar dada,” ujar Garbus.

“Itu nah si Tulamak kulihat pina panggaringan banar,” ujar Palui manunjuk.

“Mana mungkin inya panggaringan karna awaknya malah makin balamak tarus,” sahut Garbus.

“Kalu kada parcaya takuni,” ujar Palui.

“Bujurkah ikam wayahini panggaringan?” ujar Garbus batakun.

“Sabujurnya aku kada panggaringan Bus ai cuma baaritan koreng di awak,” sahut Tulamak sambil malihatakan korengnya di balukuk.

“Ini lain koreng Mak ai tapi kurap. Kurap ini ngalih warasnya, padih banar bila kana paluh dan bila sudah malilit sa-awakan bisa mati,” ujar Palui.

“Ikam jangan manakutani Tulamak Lui ai, kasihan bini wan anak-anaknya kalu inya mati. Baiknya dipadahakan tatambanya,” ujar Garbus.

Babayangan

BABAYANGAN

WAYAH malam samalam ada siaran langsung partandingan bal piala campion bubuhan Palui kada handak katinggalan jua manuntun partandingan nang disiarakan langsung oleh tv nasional, Tapi tv dirumah palui rahatan lagi rusak balum ada duit handak mambaiki tapaksa inya umpat manuntun ka rumah Tulamak.

“Aku malam tadi manuntun main bola siaran tivi itu di rumah Tulamak tapi kada puas,” ujar Palui wayah isuknya bapander wan garbus.

“Kanapa maka kada puas Lui, apakah karna kabanyakan nang manuntunnya lalu kada kadangaran suaranya,” ujar Tulamak.

“Aku nang hiran banar, rupanya partandingan bal piala campion ini pamainnya banyak banar.

Padahal, biasanya dua kasabelasan itu jumlahnya nang main di lapangan 22 ikung tapi ditivi Tulamak itu jumlahnya jadi banyak banar,” ujar Palui.

“Nang ngarannya main bal Lui ai, di mana haja main bal itu tatap sabalas ikung kada mungkin labih, nang mungkin bakurang jumlahnya karna kana kartu habang. Nah, itu Tulamaknya datang, bujurlah Mak pamain balnya banyak banar di siaran tivi ikam itu,” ujar Garbus manakuni Tulamak.

“Kada usah mahina Lui ai, buruk-buruk tiviku masih ada gambarnya walaupun bahanu tabanyak hintalu iwaknya daripada pamainnya atawa muhanya pirut kaya urang sakit gigi. Bujur haja pamainnya babanyak karna antinanya kada mau pas andaknya, jadi gambarnya babayangan tarus.

Saikung jadi dua dan nang dua jadi ampat, makanya jumlah gambar pamainnya banyak banar,” ujar Tulamak maakui.

“Nah Lui, sudah tahu kalu alasannya. Pamain balnya tatap haja sabalas ikung tapi gambarnya nang babayangan,” ujar Garbus.

“Sabujurnya aku paham haja, cuma handak manyindir Tulamak supaya antina tivinya diganti wan nang baik, jangan tutup panci itu lagi,” ujar Palui kada hakun kalah.

Kada mahambat lagi

Kada Mahambat Lagi

AKIBAT cangkal bacari, Palui kawa jua mangumpulakan duit gasan baubat. Inya handak maubati panyakit burutnya nang sudah lawas diharitnya. Ujar dokter Palui harus manjalani uperasi ringan.

Dua hari Palui bamalam di rumah sakit, isuknya Palui manjalani uperasi. Akhirnya burutnya suksis diangkat imbah sajam satangah ditangani ulih dokter.

“Kaya apa rasanya pa Palui?” ujar dokter manakuni Palui.

“Alhamdulillah, sudah kada ngalih lagi bajalan, sudah kadada nang basangkangan lagi,” ujar Palui.

“Kalo kaya itu pa Palui, isuk lusa sudah kawa bulik ka rumah. Sudah kawa baaktipitas nangkaya biasa lagi,” ujar dokter. Tapi ingatakan jangan baangkat nang barat-barat dahulu,” ujarnya pulang.

“Tarima kasih pa dokter,” ujar Palui kahimungan karna kada baisian burut lagi.

Imbah sabulan bulik ka rumah, Palui bakajutan cungul pulang di rumah sakit. Lalu mandapati dokter nang mauperasinya.

“Ada apa pa Palui, apakah ada kaluhan lagi?” ujar dokter batakun.

“Sabujurnya ulun baik-baik haja dokter ai. Ulun kadada kaluhan sama sakali, awak ulun sihat kawa bajalan gagah wan basalawar jin lagi,” ujar Palui.

“Tarus napa tujuan pa Palui kamari?” ujar dokternya bingung.

“Anu pa dokter, pian kawalah mauperasi ulun lagi. Kawalah pian mambulikakan burut ulun nang pian uperasi samalam?” ujar Palui supan-supan.

“Hau, kanapa pa Palui,” ujar dokter takajut.

“Anu pa dokter, sabujurnya nang ada kaluhan itu bini ulun. Inyalah nang manyuruh ulun babulik ka sini,” ujar Palui manarangakan.

“Wah dasar bujur anih bini pa Palui itu. Saharusnya inya basukur karna pa Palui sudah sihat, tapi kanapa maka inya labih katuju lakinya babulik baisian burut pulang,” ujar dokter hiran.

“Inggih. Tapi bini ulun bakaras manyuruh ulun manamui pian, kalo-kalo pian kawa mambulikakan burut ulun supaya nangkaya samula,” ujar Palui pulang.

“Anih, ini anih,” ujar dokter kada habis pikir. “Kanapa garang, napa alasannya maka bini pa Palui minta supaya burut pa Palui dibulikakan pulang?” ujar dokter handak tahu alasannya.

“Anu..., sabujurnya anu, alasan bini ulun ujarnya wayah ini asa ada nang hilang wan asa kada sanyaman dahulu lagi. Dahulu sabalum bauperasi ujarnya nyamannya dobol alias tu in wan, tapi imbah diuperasi ujarnya kadada nang mahambat-hambat lagi,” ujar Palui pina supan bapadah.

Sambahyang baruku

KISAH SAMBAHYANG BARUKU
Salawasumur makin batuha, Palui baubah banar. Sambahyang lima waktu digawinya tarus. Tapi nang ngarannya katuju ka warung tatap kada sing ubahan.
“Rasa lapang hati Mak lah limbah manggawi kawajiban kita,” ujar Palui
“Bujur Lui ai, bahari maka kita pina kuler sambahyang,” sahut Tulamak.
“Itu ngarannya kita dapat hidayah dari Allah,” ujar Garbus manyahuti.

“Dua kali aku sudah mandangar kawal kita ni kaya ustadz, balajar di mana ikam Bus?” Palui hiran.
“Mandangar guru satiap malam Jumahat bayasinan. Cuma aku wayah ini katuju jua mambaca buku agama,” ujar Garbus.
“Amun kaya itu aku handak batakun pang? Aku ni rancak sambahyang kada tapi khusu’, pikiran ka sana ka mari, apalagi limbah malihat babinian, bisa taingat inya wayah sambahyang,” ujar Tulamak
“Ikam kada sah Mak ai, amun sambahyang kaya itu,” ujar Palui tatawa.
“Amun handak khusu’ cuba balajar babacaan lawan tarjamaahnnya, jadi kita tahu maksud dari bacaan nang kita baca,” ujar Garbus manjawab.
“Amun kita ngalih mahapal artinya pang?” ujar Palui.
“Cuba pikiran bulikan bahwa kita mahadap ALLAH, makanya bila sambahyang kita disuruh mata manuju ujung sajadah,” ujar Garbus.
“Kaena ku cubai,” ujar Tulamak.
“Aku bulihlah batakun Bus,” ujar Palui.
“Amun kawa ku jawab, ku jawab…amun kada kawa, baarti ilmuku balum sampai,” ujar Garbus.
“Kalu sambahyang kada baruku kaya apa,” ujarnya.
“Kada sah Lui ai sambahyang kita,” ujar Garbus.
“Tapi rancak Julak Ijul, Abah Rahmat tamasuk Tuhirang sambahyang kada baruku”, ujar Palui.
“Di mana haja Lui ai, amun sambahyang tatinggal rukunya kada sah,” ujar Garbus.
“Aku kada batakun ruku sambahyang, tapi batakun tatinggal ruku. Malah ujar Julak Ijul sambahyang tatinggal ruku tu harat. Sualnya, sambahyang kada bulih sambil maisap ruku,” ujar Palui mangalahakan garbus.

Manangguh laki bini

Salawas di Banjar Palui rajin banar bajalanan, saban minggu inya bakuliling ka kampung-kampung mainjam sampida dutrap mamarinanya. Kalu minggu-minggu dahulunya inya sampai ka Aluh-Aluh, ka Malintang wan ka Sungai Tabuk, minggu sabalumnya ka Taluk Kubur maka minggu tadi inya sampai ka Guntung Papuyu Gambut.
Nang dilihatnya kada lain pahumaan karing wan batang banih nang kasalukutan hingga matanya taumpat padas kana kukus.Karna kauyuhan maka inya tapaksa bamandak di warung parak kantur kuperasi, imbah manyandarakan sapida langsung umpat duduk disasala urang banyak nang lagi rami bakikisahan.
Imbah mamasan banyu teh, malikit ruku lalu sambil angguk-angguk Palui umpat mandangarakan urang bapapanderan.
Kisahku ini karna kahirananku tahadap kapipintaran wan kahaharatan urang Hamuntai ujarnya.
Cuba pang sambat napa nang jadi kahiranan ikam itu ujar Aban batakun.
Urang di Hamuntai itu pintar banar kawa manangguh itik bini wan itik laki nang hanyar kaluar matan hintalu, ujarnya.
Itu masih balum harat, karna ada lagi nang labih harat pada itu yaitu urang Halabiu jawab Aban.
Cuba sambat napa kaharatannya itu sahut Alui.
Kalu urang Hamuntai cuma kawa manangguh itik bini atawa itik laki nang hanyar mamacah, tapi urang Halabiu matan hintalunya haja sudah kawa manangguh mana hintalu itik laki wan mana hintalu itik bini ujar Aban mangalalak tatawa.
Mandangar urang batatangguhan wan bahaharatan itu ahirnya Palui kada kawa manahan hati lalu umpat jua bapander ;
Ulun ampun maaf, umpat jua manyurung pander ujar Palui.
Ayu, silahakan haja sambil bararamian ujar Aban.
Kalu pakacil Aban wan pakacil Alui tadi masing-masing kawa manangguh anak itik laki wan anak itik bini, nang lainnya kawa manangguh hintalu itik laki wan hintalu itik bini, maka aku kawa manangguh itik laki wan itik bini itu wayah matan inya bakumpul, wayah inya maulah hintalu ujar Palui.
Waaahhh……. mana mungkiiinnn ujar Aban wan Alui taimbai mangaramputakan.
Bukannya mana mungkin lagi….. tapi pasti aku kawa manangguhnya ujar Palui.
Jawabannya adalah ……bahwa itik laki pasti nang diatas sadangkan itik bininya pasti nang dibawah sahut Palui sambil lihum kada hakun kalah dalam pander bahaharatan itu.
Ayu ja kita kadada nang kalahnya, manang sabarataan ujar bubuhannya sambil basalaman wan Palui. Sumber B-Post

Sapuakan kakapala

Ujar urang, rancak bajalan banyak pangalaman. Makanya Palui taharat pada kakawalannya. Inya kawa bakisah macam-macam bila sudah bulik ka banua, tamasuk waktu inya umpat rumbungan paninjauan ka Jawa, padahal inya jadi tukang angkut barang haja.

Amun Palui suah ka Jawa maka Garbus, Tuhirang, lawan Tulamak paling-paling suah ka kuta kabupatin haja. Hanyar-hanyar ini, Palui lawan kakawalannya batuturuk duit handak tulakan ka Banjar, mandangar habar sudah banyak banar nang hanyar wan kadada di banua.
“Bajalan jangan papalingau, jangan bajurut, kaina dipadahakan urang bukit. Kita pacang malihat tuku saraba ada, tuku urang sugih, kadada panjaga bisa maambil saurang, haraganya pas, kada bulih batatawaran. Di situ samunyaan ada, ada jua biuskupnya, ada wadah mainan kakanakan, main biliar, main dingdung, ada warung makan, bila malam ada urang banyanyi, baigal macam-macam ai.” Ujar Palui kada sing mandakan, tahingal-hingal inya mamadahakan sampai pina ba-buihan ha muntungnya. Imbah bakuliling, puas balilihat ka kiri ka kanan, Palui mambawai kakawalannya makanan ka warung Ciken.
“Aku minta nasi putih haja jangan kantang basanga, iwaknya papuyu baubar.” Ujar Garbus.

“Kaya itu jua aku, iwak pais patin wan gangan asam haja.” Ujar Tuhirang.

Tulamak badiam haja, mairingi ujar Palui, liurku saraba cucuk ujarnya.

“Maka matan tadi sudah aku padahi jangan minta macam-macam umpati aku haja, inya warung ngini warung urang luar nagari, bayar badahulu hanyar makan, lain kaya di banua kita, itu artinya urang kada parcaya lawan kita, takutan kalu di tinggalakan bukah imbah tuntung makan.” Ujar Palui.

Imbah itu macam-macam pulang sambatan buhannya. Hayam bagalapung di padahakan gaguduh, banyu bauap di padahakan maigut muntung, nasi batakar di padahakan pamalar, nang bulih maambil banyak tumat lawan sambalnya haja.

Imbah tuntung makanan bubuhannya abut pulang kadada pambasuhan tangan, padahal mulai makanan tadi sudah kada babasuh jua, sakalinya Palui kada ingat mamadahakan andakan pambasuhan tangan.

“Dasar pamalar banar, pakacauan haja kadada.” Ujar Garbus manggarunum.

“Pakai haja ilmu urang bahari.” Ujar Tuhirang. Tangan bakas makan sapuakan ka kapala, ka rambut sampai lingis barasih, tangan bakas makan, bakas iwak ada apuahnya, ubat rambut supaya jangan bahuban, supaya tatap hirang.

Mandangar ada apuah ubat huban, taimbai bubuhannya manyapuakan tangan ka kapala. Palui nang hanyar datang matan babasuh tangan tanganga malihat kalakuan kakawalannya nitu.

GULA BAKARUNG

Gula Bakarung

KARNA kadada baisian mudal gasan bausaha, tapaksa Palui baubah gawian jadi tangkulak atawa padagang parantara. Tapi biar tapaksa rupanya gawian manangkulak ini cucuk wan Palui nang pintar pander, pintar marayu, pintar baulah masam-macam alasan wan sakaligus rajanya mahaluya. Alhamdulillah hasilnya cukup haja gasan baju salawar anak buah dan makan nginum sahari-hari.
 
Tapi Palui paling kada katuju pabila gawiannya itu di sambat gawian manangkulak. Inya labih katuju bila gawiannya itu dipadahakan sabagai padagang parantara, walaupun artiannya sama haja. Kadaduanya sama-sama manggubang.

“Kanapa ikam sarik amun dupadahakan tangkulak Lui. Padahal pangartian tangkulak wan padagang parantara itu kada jauh bida?” ujar Tulamak handak tahu alasan Palui.

“Kalu tangkulak itu bisa maikari, bisa mangaramputi tapi kalu padagang parantara itu jujur karna mandapat parsen sesuai parjanjian.”

“Lalu barang napa nang ikam jadi padagang parantara itu?” ujar Garbus.

“Aku jadi padagang parantara untuk barang gula bakarung karna gawiannya nyaman,” ujar Palui.

“Ooooo...... kalu kaya itu ikam banyak bajasa karna barang itu tamasuk sembako nang diparluakan masyarakat. Sabujurnya ikam umpat PT atawa CV siapa Lui maka kawa jadi parantara barang gula bakarung itu, musti parusahaan ikam itu ganal banar kawa mandatangakan gula itu matan Jawa sana,” ujar Tulamak.

“Matan Jawa? Matan Jawa mana?” ujar Palui bingung.

“Kalu kada pabrik matan Jawa pasti pabrik matan Pelaihari karna hanya di sanalah adanya pabrik gula nang bajual bakarung-karung itu,” ujar Tulamak.

“Hadangi satumat aku ma-ambil cuntuh gula bakarungnya,” ujar Palui lalu bukah ka rumah maambil gulanya dan langsung manampaiakan gulanya itu ka-anu Garbus wan Tulamak.

“Ini gula bakarung napa Lui? Gula bakarung itu artinya bakarung atawa bakadut atawa bakampil. Ini gula habang babigi, ujar ikam tadi gula bakarung,” ujar Garbus manumpalak.

“Ini bujuran gula bakarung Mak ai, ini gula habang ulahan urang bakarung kacamatan Hangkinang Kandangan,” ujar Palui manarangakan.

Tatempel perangko

Tatempel Perangko

PALUI mendapat tanah kabun warisan matan mamarinanya dengan pasan supaya bujur-bujur diharagu gasan kehidupannya. Manurut pasan itu jua, kecuali tapaksa banar hanyar bulih dilapas, disandaakan atawa dijual. Wayah musim kamarau panjang tadi, kabun itu kada tapi mahasilakan apalagi kada diharagu karna andaknya jauh. Wayah Palui handak kawin, ahirnya kabun itu dijual wan mamarina Tulamak.

“Aku tarima kasih banar wan mamarina ikam Mak ai karna hakun mambantu aku, manukari kabunku,” ujar Palui.

“Aku tarima kasih jua wan ikam Lui ai karna kabun nang ditukar itu dijulung sidin wan aku, supaya aku nang maharagunya,” sahut Tulamak.

“Ini ngarannya tukar jual papadaan,” ujar Palui.

“Tapi mamarinaku itu manyambat bahwa jual tukar ini balum syah,” ujar Tulamak.

“Kanapa maka dipadahakan balum syah Mak? Maka sudah ku-ulahakan kuitansinya,” ujar Palui.

“Kuitansi itu kada syah jua, karna kada ditempili materai,” ujar Tulamak.

“Kalu sual materai gampang, mana kuitansinya kaina ku-ulahakan nang hanyar,” ujar Palui.

“Dasar salah ikam Lui ai karna kada mamanuhi katantuan hukum,” ujar Garbus umpat mambari kumentar.

“Mamarina ikam itu masih untung Mak ai, karna aku masih hakun maulahakan kuitansi, sedangkan aku sama sakali kada sawat maminta surat-manyuratnya karna mamarinaku itu talanjur mati bakakajutan,” ujar Palui.

“Kalu parlu aku umpat jadi saksi dikuitansi itu,” ujar Garbus manawarkan diri.

“Kuitansi kada parlu basasaksian Bus ai nang panting bamaterai,” ujar Palui. Isuknya Palui mandatangi rumah Tulamak manjulung kuitansi nang sudah dibaikinya.

“Tarima kasih ikam bauyuh-uyuh mambaikiakan kuitansinya,” ujar Tulamak.

“Satiap saat aku tatap mambantu bila mamarina ikam masih mamarlukan surat-manyuratnya,” ujar Palui.

“Kalu ikam siap mambantu manulungi surat-surat nang diparluakan, tulung ulahakan sakali lagi kuitansi ini,” ujar Tulamak imbah mamparhatiakan kuitansi nang dijulung Palui itu.

“Napa lagi salahnya Mak?” ujar Palui pina kabaratan.

“Maka ikam sudah bajanji basadia manulung bila surat-suratnya balum langkap? Kuitansi ini kuanggap balum syah Lui ai,” ujar Tulamak.

“Jangan mahina aku Mak ai, bauyuh-uyuh aku mambaikinya kanapa lagi dianggap balum syah?” ujar Palui mangarasi.

“Cuba ikam itihi bahimat, nang ikam tempel ini napa Lui? Apakah materai atau perangko?” ujar Tulamak.

“Masya Allah, tauyuh maurus kuitansinya daripada mambantas duitnya,” ujar Palui gagarunum kada kawa bakutik lagi digawi Tulamak.

B P K

B P K

WAYAH ini bilang banyak banar bubuhan urang nang sakulah tinggi. Jadi kalu handak mancari nang pintar-pintar, kada bataha ngalih lagi. Baduyau. Handak lulusan tumatan luar nagri-kah, atawa dalam nagri-kah, sakahandak tu pang mamilih. Tapi kalu handak manamuni urang nang bujur harus, bilang kangangalihan banar.

Mintu jua lawan bubuhannya nang mangalula sumbangan atawa bantuan susial atawa bubuhan nang maurusi duit rakyat, habang-hijau tu pang mata ‘kada purun’ malihat duit nang sing banyakan.

Baluman lagi sampai ka tangan rakyat, duitnya sudah banyak banar nang bakurang. Sanunuhan dibagiakan jua, pasti nang manyambut bubuhan papadaan inya haja.

“Ujar habar, kantur-kantur di banua kita banyak nang camuh lapuran kauangannya, Lui lah,” ujar Tulamak imbah tuntung mambaca surat kabar.

“Maka kada sadadikit duitnya, Mak ai. Duit rakyat ja pulang,” sahut Palui.

“Itu pang gudaannya kalu jadi pajabat tinggi,” Garbus manyahut. “Kalu kada kuat-kuat iman, pacangan kada handak mambunguli tarus pikirannya.”

“Tapi duit nang kulihan marga mamintari urang, kada babarakat. Pacangan habis tarus. Sama haja kaya paribasa; duit setan dimakan hantu,” sahut Palui sambil mangulibi.

“Untung bubuhan BPK bapahatian manyalungkarnya. Jadi masarakat awam nang ampun duit kawa mangatahuani pada inya sudah dibunguli,” sahut Tulamak.

“Ujar habar, kaina bubuhan KPK pulang nang pacangan datangan. Pacangan ingar tu pang tikus-tikusnya,” ujarnya lagi pina garigitan.

“Jaka kawa bubuhan BPK naitu mandatangi kantur PLN, Lui lah,” ujar Garbus sakali bapandir.

“Napa mun rancak pajah lampu, rancak jua rumah urang kamandahan.

Bubuhan BPK jua nang kipuh kada kahagaan,” ujarnya lagi pina basumangat banar.

“Hau. Napa pulang maksud ikam tu, Bus? Apa hubungannya bubuhan BPK lawan kamandahan?” anyak Palui batakun supaya kada salah paham.

“BPK nang mana pulang nang ikam surung, Bus?” umpat jua Tulamak batakun.

“Cah. Maka ajin ikam badua pina pintar pada aku, tapi lawan BPK haja kada tahu lah?!” jawab Garbus baagak.

“BPK naitu, artinya; Bubuhan Pamajah Kamandahan, nang rajin karengongan muturnya kalu ada rumah urang kaapian,” ujar Garbus manjalasakan.

Timbul Palui wan Tulamak mangalangkang katawaan mandangar panderan Garbus.

“Garbus. Garbus, pambabal diharagu,” ujar Tulamak katawa sambil uling-uling kapala. “BPK naitu Bus ai, artinya; Badan Pamariksa Kauangan,” ujar Palui mambujurakan sambil katawa jua.

Katahuan imbah

Katahuan Imbah

SUBUH itu hari dingin banar karna bakas hujan samalaman. Bubuhannya si Palui, si Garbus, Tulamak wan Tuhirang balum takumpul, walaupun sudah bajanji biarpun hari hujan labat, tatap tulakan ka masigit. Bahkan sampai qamat, waktu sembahyang sudah parak balum ada jua bubuhannya kalihatan. Tapi imbah tuntung sembahyang sampai salam lalu bubaran, hanya Garbus wan Tulamak haja nang kalihatan.

“Kukira ikam kada ka masigit, mulai tadi kada kalihatan,” ujar Garbus.

“Talalu-lalu banar ikam Bus ai kalu sampai kada malihat awakku nang ganal ini,” sahut Tulamak.

“Di mana ikam duduk?” ujar Garbus mahimati.

“Aku datang talambat Bus ai maka aku duduk di barisan syaf paling balakang,” ujar Tulamak.

“Kalu syaf paling balakang itu adalah syafnya bibinian,” ujar Garbus sambil tatawa.

“Kalu aku talambat kada napa-napa karna masih sawat haja umpat bajamaah, tapi kawal kita si Palui itu sampai tuntung salam kada kalihatan batang hidungnya,” ujar Tulamak.

“Kawal kita nang saikung itu sudah kabiasaan katuju sembahyang mang-qada alias batahur hutang karna talambat,” ujar Garbus, sambil manunjuk Palui mancungkung duduk di gardu.

“Kanapa maka talambat Lui, padahal kita sudah bajanji biarpun hujan labat tatap ka masigit,” ujar Tulamak.

“Mungkin kanyamanan guring babungkun karna hari dingin-dingin,” ujar Garbus.

“Sakali-sakali uzur bulih haja kalu karna bahalangan sebab kawa haja diqada,” ujar Palui.

“Ayu lakasi baudhu lalu sembayang, masih sawat haja waktunya kaina kami hadangi ikam di warung acil,” ujar Tulamak.

Wayah Palui manguliat handak badiri, kadangaran bininya bakiyauan : “Ui abahnyaaa ... abahnyaaa ... lakasi bulik,” ujar suara bini Palui nyaring banar.

“Nah Lui ikam dikiyau pulang,” ujar Garbus.

“Abahnya lakasi bulik,” ujar suara bininya lalu kada lawas bininya mancungul datang ka gardu.

“Kanapa maka abahnya disuruh bulik, Palui handak baudhu,” ujar Garbus.

“Baudhu napa? Inya kubawai bulik karna handak kusuruh mandi,” sahut Palui.

“Biar balum mandi bulih haja baudhu dan sembahyang,” ujar Garbus mambilaakan Palui.

“Kada bulih baudhu apalagi dibawa sembahyang Bus ai, karenaaa ... karna aku balum mandi. Maklumlah malam tadi tapakai,” ujar Palui pina supan kasisipuan.

“Naahhh ... katahuan Imbah ba...,” ujar Garbus wan Tulamak mangalakak tatawaan.

MAMBURUNG KANGKUNG

Mamburung Kangkung

MATAN jauh talihat Palui pina mangincang bajalan ampah ka wadah Garbus wan Tulamak nang lagi badudukan di gardu runda. Taheran-hiran jua bu bu han­nya malihat.

“Hakunlah bu bu han ikam ma ng ga ni’ i aku ka pasar kar na ada nang ku cari,” ujar Palui pina manggah.

“Handak man cari napa Lui maka panting banar?” ujar Tulamak.

“Nang kucari ini cukup panting, kada kawa ditundatunda lagi,” ujar Palui.

“Umpat batakunlah Lui, sabujurnya ikam ka pasar ini handak manukar napa?” ujar Garbus ma-anyaki.

“Pukuknya nang kutukar ini panting banar karna bila kada kutukar bisa mati,” ujar Palui.

“Napa bandanya Lui?” ujar Tulamak.

“Kaina haja kusambat, bubuhan ikam pasti tahu,” ujar Palui langsung mambawai bubuhannya tulakan ka pasar.

IMBAH sampai, bubuhannya bakuliling pasar manggani’i Palui mancari sesuatu nang balum mau disambatnya. Lalu sampailah bubuhannya di los pasar sasayuran.

“Barapa kangkung ini sakaranjang?” ujar Palui.

“Sakaranjang itu isinya 100 ikat haraganya Rp20 ribu. Tapi bila diborong hakun haja Rp15 ribu,” ujar panjual sayur.

“Gasan napa Lui ikam mamborong kangkung sakaranjangan?” ujar Garbus mambisiki Palui.

“Bila kada kutukar bisa bamatian Bus ai,” sahut Palui. Lalu inya batakun pulang wan panjual itu. “Kawalah kurang, Rp10 ribu haja, jadi saratus rupiah saikatnya,” ujar Palui lalu mangaluarakan duit lembaran Rp500. “Kalu sampiyan hakun, ulun manukar Rp500 haja, jadi dapat lima ikat,” ujar Palui.

“Dasar pamalar ikam ini Tuh ai, manawar haraga sakarajangan, ba-agak main borong sakalinya manukar lima ikat haja,” ujar panjual gagarunum manumpalak Palui.

Gasan napa kangkung itu Lui maka dipadahakan bila kada manukar bisa bamatian?” ujar Garbus hiran.

“Aku handak mambari makani karinciku, sudah dua hari kahabisan kangkung,” ujar Palui pina kada tahu manahu.

“Palui, Paluiii... bauyuhuyuh kuliling pasar hanya mancari kangkung, di balakang rumahku satuyuk kangkung,” ujar Tulamak umpat manumpalak